O campo de San Roque, en Cespón (Boiro) vai ser este sábado 6 de setembro un fervedoiro de música, baile e xogos tradicionais. Estamos a falar do Encontro Tradicional de San Roque organizado polo colectivo local Abeloura. Inclúe xogos tradicionais (a partir das 17.00) e logo un espectáculo de circo para público infantil e familiar a cargo de AsSircópatas. A continuación do serán tradicional (ás 20.00 horas) comezará (ás 22h) o concerto de Faíscas da Pontraga. Haberá churrasco, callos con garavanzos e bebidas a prezos populares.
Ao mesmo tempo, desenvolverase unha xornada de xogos tradicionais no marco do programa Xogantina, tamén a partir das 17.00 e no mesmo emprazamento de Cespón. As persoas participantes poderán introducirse e probar as súas habilidades nos xogos da ra, do tres en raia, do lanzabolas ou dos trebellos tradicionais de madeira, entre outros.
