Este venres 20 de setembro temos unha cita co audiovisual en Porto do Son. En concreto, presentarase na Casa da Cultura o documental O Son do Mar, desenvolvida pola produtora compostelá Xurdir para promover, visualizar e reivindicar as mancheas de tesouros paisaxísticos, naturais, humanos, turísticos, patrimoniais e culturais de Porto do Son. A cita será ás 20.00 horas e contarase coa presenza do alcalde Luis Oujo e máis de Noelia Francisco, directora da área de Produción de Xurdir. A presentación estará aberta á cidadanía.
Xurdir, con base no Castiñeiriño (Santiago) está a producir unha serie de documentais que teñen como principal obxectivo por en valor a industria e a actividade económica que se realiza nos concellos da nosa terra. Xa ten demostrado o seu bo facer co noso territorio, por exemplo con Boiro, A Pobra, Ribeira e Rianxo, e agora agarda xerar novamente un impacto considerábel nas redes co seu audiovisual sobre Porto do Son.
