O Concello de Boiro informou da licitación por un importe de 74.780,17 euros das obras para a mellora da infraestrutura viaria no Parque Empresarial de Espiñeira, unha actuación que conta co financiamento da Consellería de Economía, Industria e Innovación da Xunta de Galicia. O obxectivo é continuar optimizando a infraestrutura dunha vía secundaria da fase I do polígono dunha lonxitude de 680 metros. No ano 2023 comezouse coa mellora de parte da vía, unha actuación que se completa agora con esta nova actuación.
Tal e como se veu realizando, proxéctase a mellora da vía coa realización dun tramo de beirarrúa e pavimentación das beirarrúas existentes, que na actualidade se atopan sen pavimentar, facendo que estas sexan máis estreitas e menos seguras para as persoas usuarias do polígono.
O complexo empresarial boirense comezou a súa andaina no ano 1998 e na actualidade conta cunha superficie de máis de 300.000 metros cadrados e mais do 80% das parcelas ocupadas. “Debido ao tempo transcorrido dende a súa execución e ao alto nivel de ocupación as infraestruturas presentan necesidades de mellora”, informaron fontes do Concello, engadindo que as actuacións para optimizar a infraestrutura viaria atópanse en fase de licitación e todas as empresas interesadas pode presentar as súas ofertas ata o vindeiro 24 de setembro a través da Plataforma de Contratos do Sector Público.
