O alcalde de Boiro, José Ramón Romero, mantivo un encontro coa presidenta e a secretaria xeral de Cámara de Comercio de Santiago, María Pais e Rosa Mary Cardeso, xuntanza na que tamén participou o concelleiro de Comercio, Formación e Emprego, Roberto Lojo. A sesión de traballo tivo como obxectivo estreitar lazos entre as dúas entidades para “levar a cabo colaboracións” e “estudar liñas de traballo conxuntas entre o Concello e a Cámara de aposta polo sector empresarial e o emprendemento”.
O alcalde amosou aos representantes da entidade cameral as instalacións do Centro de Formación e Viveiro de Empresas que o Concello de Boiro ten no Polígono Industrial de Espiñeira e que contan con viveiro de empresas, unha zona de coworking, aulas de formación e tamén aulas taller.
“A Cámara de Comercio é un referente a nivel nacional que axuda a potenciar o crecemento económico das empresas. A gran aposta deste goberno é que Boiro sexa un referente na formación e o emprego por iso buscamos a colaboración con entidades que contribúan a este fin”, afirmou o alcalde.
