Este sábado 28 de setembro está convocada en Escarabote unha concentración veciñal de rexeitamento ao proxecto municipal para mudar o nome da rúa do Muelle (Carretera do Muelle). A concentración será ás 12.00 horas na devandita rúa de Escarabote-Lampón. O obxectivo da mesma é pedir ao Concello que revoque o troco do nome da dita rúa.
A veciñanza que impulsa a mobilización di que o Goberno local “non atende” a súa petición de recuperar o nome de Carretera do Muelle na dita vía e rexeitan a decisión actual de chamarlle “Pai Joseba”. Lembran tamén que no pleno do pasado 21 marzo interviñeron no pleno da Corporación presentando medio milleiro de sinaturas para que se restableza o nome orixinal.
Defenden que “todos os topónimos teñen a súa orixe nas características de lugares e dos usos e costumes do pobo” e que “por tradición son os habitantes os que nomean os lugares onde habitan segundo os usos e as características físicas ou xeográficas dos lugares, e os organismos oficiais respéctano”.
E engaden: “Entendemos que o Goberno local con maioría absoluta acepte que se faga un recoñecemento ao Padre Joseba, pero rexeitamos que se impoña o cambio de nome da citada rúa”.
O Concello baseou a súa decisión no feito de que “Carretera del Muelle” é un nome coloquial que non é oficial nin un topónimo tradicional, simplemente un indicativo informal de lugar e de acceso, e que tampouco garante as normas básicas do galego.
