Este 17 de setembro pola tarde celebrouse na Casa da Cultura de Porto do Son a presentación do libro Moito que contar. Dépor e radio: dúas paixóns e un cento de historias, escrito por Moncho Viña e publicado por Baía Edicións. A cita tivo un formato de espazo aberto de debate arredor do xornalismo deportivo e da literatura e no que o autor, xunto con Alfonso Hermida Mejuto e Henrique Rabuñal, ofreceu un cento de relatos para renovar lembranzas e para que as novas xeracións descubran os detalles dunha historia coma poucas: a que uniu durante décadas os logros do Deportivo da Coruña e o desenvolvemento da comunicación xornalística coruñesa e galega.
Sinopse
Moito que contar de Moncho Viña é un exercicio de xornalismo. A carón dos grandes nomes do deporte agroman tamén persoeiros e feitos menos visíbeis. A historia e a intrahistoria. Seguimos o Deportivo de onte, de hoxe e de sempre. As súas xestas nacionais e internacionais e as súas lendas: Amancio, Arsenio, Luís Suárez, Vicente, Fran, Djukic, Bebeto, Mauro Silva ou Djalminha. O foco ábrese para inserir historias do Celta ou do Compostela e doutros deportes como o baloncesto, o ciclismo ou o hóckey.
Sobre o traballo metódico e vivencial de Moncho Viña, un dos grandes xornalistas deportivos galegos, Moito que contar ábrese tamén ás achegas que realizaron Alfonso Hermida, Adrián Viña Menéndez e Henrique Rabuñal. O libro contén ademais un feixe de fotografías que inmortalizan tempos e lugares.
