O auditorio da Casa da Cultura de Boiro acolle este venres ás 21.00 horas unha función para público adulto de Fulano, Mengano e Citano: O que hai que ver.
O que hai que ver! é unha peza protagonizada por Marcos Alonso, Suso Pando e Manuel Pombal. Trátase dunha escolma dalgúns dos mellores sketchs da historia de Fulano, Mengano e Citano. A maiores aparecen outros de nova creación aos que se lle engaden cancións orixinais. Trátase, nas súas palabras, dun espectáculo variado, dinámico e sorprendente, seguindo a liña de humor que caracteriza á compañía.
É en definitiva unha proposta na liña da compañía que nos mostra unha serie de historias nas que o espectador se sente protagonista e participe directo. Todo contado cun humor rebordante que fai que a xente saia do teatro satisfeita, feliz e con ganas de voltar.
