Divulgar aspectos do pasado relacionados coa historia e o patrimonio do municipio é o obxectivo das xornadas A Pobra do Caramiñal non tempo, que comezaron na tarde do sábado. O arranque correu a cargo do profesor, escritor e historiador,Manuel Gago, organizador do ciclo, que estivo acompañado polo alcalde, José Carlos Vidal.
No acto anunciouse a adquisión polo concello do Castro A Croa de Postmarcos que pasa o patrimonio municipal pendente do seu estudio e excavación.
O arqueólogo Mario Ramos foi o primeiro en intervir. Desvelou os resultados preliminares que se conseguiron obter tras as escavacións realizadas na Corte do Santo, en Posmarcos. Os traballos serviron, segundo explicou, para «reforzar a idea de que ou lugar tinga unha natureza relixiosa e funcionaba como eremitorio ou oratorio». Engadiu que se calcula que foi abandonado no século XIII. Durante o seu relatorio, tamén se referiu a outros xacementos de Barbanza que permiten coñecer como era a vida na Idade Media, como o Castelo de San Mamede de Lousame, onde se realizaron traballos o ano pasado.
A segunda das conferencias correu a cargo de Xosé María Fernández Pazos, xornalista e historiador, cronista oficial de Ribeira, e especialista no naufraxio do Santa Isabel. Ademais de relatar aspectos xerais do tráxico suceso, aproveitou a súa presenza na Pobra para referirse a detalles relacionados con este municipio. Así, sinalou que o barco tiña dez pobrenses na súa tripulación, dos cales dous salvaron a vida: un fogonerio de 33 anos e un mariñeiro que ese día non se atopaba a bordo. Fernández Pazos tamén falou da relación de Valle-Inclán co Santa Isabel do que dixo que quixo escribir unha obra sobre o afundimento: “As mulleres de Sálvora: traxedia grega”, pero non chegou a rematala.
A terceira charla correu a cargo de Ana Isabel Boullón, natural de A Pobra e membro correspondente da Real Academia Galega, quen fixo unha detalladada presentación sobre os apelidos da Pobra e a súa orixe.
A derradeira das charlas correu a cargo da sonense, Pilar Sampedro Martínez, mestra e pedagoga quen falou sobre os escenarios literarios referidor ó municipio pobrense pasando revista os autores e ás súas obras nas que se recollen referencias o concello.
As charlas foron seguidas por un auditorio repleto de público e transmitidas por internet e poden verse no enlace:
