O día 22 de setembro comezará o outono, feito que fai cavilar en que xa quedan poucos días para que pasen as calores que nos afectaron nos tres últimos meses. Por diante, outros nove meses para tomar medidas conducentes a minorar os efectos das altas temperaturas que, tamén na comunidade galega, se fan sentir con mortes polos efectos da calor: 707 falecidos este ano, segundo os datos que baralla a Fundación para a Investigación do Clima (FIC). Son estes datos baseados no mapa interactivo da propia Fundación que atinxen ao verán meteorolóxico deste ano en Galicia, meses de xuño, xullo e agosto.
A de Pontevedra é a provincia con maior número de vítimas pola calor: 262, das que 207 son atribuídas á exposición á calor moderada e 55 á calor extrema, mortes que, en total, representan aproximadamente o 2,4% do total de mortes producidas este ano na devandita provincia.
No caso da Coruña, as cifras son semellantes: 224 falecidos, dos que 36 son debidos a episodios de calor extrema (1% do total).
A provincia de Ourense, considerada como a que rexistra as máis altas temperaturas, contabiliza un total de 114 mortes debidas á calor e malia ser unha provincia de poboación moi inferior ás de Pontevedra e A Coruña. 35 destas mortes son atribuídas á calor extrema, culpable do 3,2% delas.
A provincia de Lugo rexistra 107 mortes asociadas á exposición á calor, das que 20 son atribuidas a episodios de calor extrema.
O informe da FIC recolle que Galicia experimenta un ascenso no número de mortes pola calor deste ano. Malia ser así, non é, ata hoxe, o 2024 o ano máis caloroso (aínda que a tendencia é ascendente): a importancia do número de mortos pola calor en 2024 non supera a temperatura rexistrada en 2022, que se caracterizou por unha onda de calor que causou en Galicia máis de 500 falecidos. Foi 2022, o ano máis cálido que experimentamos os galegos dende a década dos 80 do século pasado, con 23 días de calor extrema en Pontevedra.
As persoas maiores son as máis sensibles a estes episodios de calor, e os colectivos vulnerables e con pouco poder adquisitivo os máis afectados polas ondas de calor.
