Galicia é unha sociedade envellecida e por tanto onde maior número de pensionistas hai, ben sexan de xubilación ou de invalidez. O problema, ademais do gran número de persoas que perciben pensións mínimas, mesmo ás que se lles ten que aplicar o complemento correspondente para garantirlles a prestación. Atopámonos en que hai unha excesiva demora na resolución do recoñecemento da situación de dependencia, en algo máis dun ano, sendo Galicia a cuarta comunidade autónoma con maior espera.
Cando unha persoa solicita o recoñecemento do grao de discapacidade, xa ten que esperar o seu e posteriormente, se ten dereito polo grao de discapacidade recoñecido, aínda ten que solicitar o recoñecemento da situación de dependencia, demorándose a resolución en máis de doce mes, cando a Lei de Dependencia sinala un prazo estimado de seis meses.
Moitas entidades sociais, traballadores sociais e familiares de persoas con discapacidade poñen o berro no ceo por estas demoras, por parte da Xunta de Galicia, que tanto prexudican ás persoas dependentes como aos seus familiares. Hai que pensar que o recoñecemento da dependencia é fundamental para os coidados, que van desde axudas económicas de 416 euros mensuais así como a atención domiciliaria, o poder acudir aos centros de día, ingresar nas residencias públicas (porque as residencias privadas supoñen un custo mínimo de 2.000 euros mensuais) así como todas aquelas prestacións e servizos de atención adecuados. É dicir poder facilitar unha atención integral ás persoas con algún tipo de diversidade funcional.
