O conselleiro de Sanidade, Antonio Gómez Caamaño, e o alcalde do Porto do Son, José Luis Oujo, asinaron un convenio de colaboración entre o Servizo Galego de Saúde e o Concello para a reforma e mellora do centro de saúde do municipio. En concerto, acordaron que a Administración galega e a local co-financien esta actuación ao 50%, cunha achega de 5.759 euros por parte de Xunta e Concello. O investimento total da obra ascenderá a 11.519 euros.
Co obxectivo de optimizar a calidade asistencial que o Servizo Galego de Saúde lle presta á poboación sonense e á espera de que se materialice definitivamente o proxecto para crear un novo centro de saúde, mellorarase o ambulatorio actual acometendo a reforma da súa cuberta, a limpeza e o selado dos seus canlóns e a reparación das xanelas.
O conselleiro lembrou que desde o ano 2009 a Xunta construíu ou reformou un total de 135 centros de saúde, “o que supuxo actuar sobre máis de 85.000 metros cadrados”. A eles hai que engadir as 4 actuacións que están actualmente case finalizadas ou en marcha: o CIS Lalín e comarca de Deza, no Porriño, en Moaña e o CIS Olimpia Valencia en Vigo. Engadiu Antonio Gómpez que “no seu conxunto a Administración autonómica investiu, nestes 15 anos, máis de 158 millóns de euros en infraestruturas sanitarias de atención primaria”.
