A Xunta e o Concello de Outes asinaron este martes 17 de setembro o convenio de colaboración para executar a conexión do paseo fluvial co centro urbano na Serra de Outes. O acordo foi formalizado pola conselleira de Vivenda e Planificación de Infraestruturas, María Martínez Allegue, e o rexedor Manuel González. As obras suporán un investimento de case 94.000€, dos que a Xunta asumirá o 70% do orzamento, case 66.000 euros, e contratará e executará as obras. O Concello achegará o 30% restante do custe das obras, redactará o proxecto e asumirá o mantemento das actuacións que se leven a cabo.
O obxectivo concreto, segundo lembrou o alcalde, “é executar a reforma do ámbito entre a avenida San Campio e o paseo fluvial do río Tins na Serra de Outes, actuando sobre os pavimentos, escaleiras e sobre as instalacións existentes”. Estas obras, engadiu, “permitirán conectar a rúa co paseo fluvial de maneira aberta, así como coa plataforma do semisoto da Casa da Cultura”. Así mesmo, crearase unha zona de esparexemento para “gozar das vistas do río” e “mellorar a zona de entronque do paseo fluvial e a ponte que cruza o río, cunha axeitada iluminación e elementos de xardinería”.
Esta intervención enmárcase no Plan Hurbe da Xunta, cuxo obxectivo é “contribuír a promover o desenvolvemento das vilas e núcleos rurais da comunidade autónoma como motores de dinamización que permiten achegar o modelo urbano a todo o territorio”.
Logo da sinatura do convenio, o alcalde, xunto co tenente de alcalde e a concelleira de obras e servizos, mantiveron unha reunión coa conselleira e co seu equipo para tratar, entre outros temas, a necesidade de acometer canto antes a reurbanización da avenida de Fisterra, proxecto xa sometido á información pública por parte da Xunta de Galicia en 2020.
