A nova edición da feira Gastromar, o salón de produtos pesqueiros de Ribeira, presentouse nos seus detalles este 13 de agosto no local da Asociación de Empresarios, organizadora do evento coa colaboración co Concello e de importantes entidades profesionais e empresariais do sector do mar. Na sesión confirmaron información xa coñecida, como por exemplo que a 3ª edición de Gastromar celebrarase os días 23, 24 e 25 de agosto, na praza de España, en horario de 13.00 a 16.00 horas e de 20.00 a 23.00 horas. Ademais, no capítulo de grandes novidades fíxose saber que este ano participaron media ducia de foodtrucks achegando ao público asistente elaboracións diversas de peixes, mariscos e bebidas.
Dende estes postos gastronómicos reivindicarase novamente a gran calidade (e variedade) dos produtos pesqueiros e marisqueiros de Ribeira e da súa contorna. En concreto, exaltaranse peixes, mariscos e elaboracións como a sardiña, o lirio, o xurelo, a empanada (de congro, sardiña e chopo), as navallas, as ameixas, os camaróns, o polbo e os mexillóns en varias elaboracións.
Ademais do capítulo de degustacións, o programa de actividades inclúe obradoiros e demostracións (showcookings) para adultos con peixes e mariscos de Ribeira, e, como novidade, organizarase un taller de divulgación para a rapazada baixo o epígrafe Ciencia Divertida e relacionado cos produtos do mar.
Na presentación, Francisco Martínez Gude, presidente da Asociación de Empresarios de Ribeira, agradeceu en nome da entidade o financiamento e o patrocinio achegado pola Xunta de Galicia, a Deputación da Coruña e o Concello de Ribeira. Tamén animou a “todos os veciños e visitantes que visiten a feira para coñecer de primeira man a gran riqueza dos nosos produtos do mar”.
Na rolda cos medios participaron Francisco Martínez, presidente da AER; Luís Pérez Barral, alcalde de Ribeira; Vicente Mariño, tenente de alcalde; Veva Betanzos, concelleira de Comercio; Fernando Abraldes, concelleiro de Mar; Jose Antonio Pérez, patrón maior da Confraría San Pedro de Ribeira; Jose Antonio Santamaría, patrón maior da Confraría de Aguiño; Pablo Pérez, membro do Consello da Cooperativa do Mar; e Ángel Martínez, xerente do bar A Caseira.
A Feira Gastromar está impulsada dende a Asociación de Empresarios de Ribeira en colaboración coas Confrarías de Aguiño e Ribeira, cos produtores de mexillón (OPMEGA), co Concello de Ribeira e, tamén coa Cooperativa de Armadores de Ribeira. O obxectivo será novamente “poñer en valor e dar a coñecer os peixes e mariscos da nosa ría”, sinalaron, ao tempo que destacaban a necesidade de reivindicar os produtos que, polas razóns que sexan, non adquiren as meirandes cotización e demanda no mercado.
