O Museo do Gravado de Artes (Ribeira), en colaboración coa a Asociación Cultural Barbantia, convocou a IX edición da exposición colectiva BarbantiaRte, que está previsto que se celebre nas salas do Museo (Outeiro 52, Artes, Ribeira) a partir do vindeiro mes de setembro. “O noso obxectivo”, explican,”é que nesta motra apareza representada a arte que se fai no Barbanza nos nosos días e darlle a maior difusión aos artistas da nosa zona”.
Segundo se estipula nas bases, acéptase todo tipo de disciplina artística: pintura, escultura, fotografía, gravado, banda deseñada, performance, videocreación… Porén, aínda que non hai medida nin temática establecida, a organización solicita que só sexa unha obra por cada artista e que non sexa anterior ao ano 2022. Para poder participar, a obra física en cuestión deberá estar no museo como data limite o 30 de agosto.
Aqueles artistas que desexen formar parte da exposición deben confirmar, a través dun correo electrónico, o seu interese en participar, a través das contas fundartes@gmail.com ou pastor@barbantia.es.
Deberán incluír unha ficha cunha fotografía do traballo a exhibir, un breve texto para ou catálogo que se editará con motivo da mostra e os datos de carácter técnico.
