O Concello de Muros acolleu este venres 23 de agosto a presentación da I Semana da Historia de Muros, unha innovadora iniciativa que se celebrará entre o 10 e o 13 de setembro e que busca poñer en valor a historia da vila dende a súa creación para así poder mirar cara ao seu futuro.
“Queremos coñecer mellor e poñer en valor o noso patrimonio histórico e cultural da man de veciños, veciñas e visitantes, mergullándonos no pasado da vila pero sempre coa vista posta no futuro”, destacou a a alcaldesa María Lago quen estivo acompañada na presentación pola concelleira de Cultura, Caridad González.
Pola súa banda, a edil de Cultura salientou “a importancia de coñecer as particularidades da nosa vila”, un dos principais obxectivos desta iniciativa que conta coa colaboración da Deputación da Coruña e do Grupo de Estudos Territoriais da Facultade de Socioloxía da UDC.
Así, do 10 ao 13 de setembro a Fábrica de Sel será escenario dun encontro entre expertos en diversas disciplinas abordarán aspectos clave da historia e do patrimonio local nunha serie de relatorios e debates que culminarán cun concerto de clausura.
A programación arrancará o martes 10 de setembro ás 20:00 horas, co acto institucional de presentación das xornadas. Nesta sesión inaugural as licenciadas en Historia da Arte pola USC María Mayo, e Pepa Fernández Fernández ofrecerán unha charla titulada A historia de Muros a través do Arquivo Municipal. O mércores á mesma hora o doutor en Xeografía Humana pola USC Pedro García Vidal ofrecerá a conferencia A vila medieval de Muros: claves para interpretar unha paisaxe urbana de séculos.
O xoves será a quenda da doutora en Historia da Arte pola UIB Margarita Novo Malvárez, quen analizará tres icónicos edificios que marcaron a identidade cultural da vila na conferencia Arquitectura do ocio en Muros: Teatro Mercedes, Cine París e Cine Avenida.
A semana de actividades culminará o venres, cunha intensa xornada que comezará ás 20:00 horas co debate Retrospectiva e Prospectiva: Un Debate entre A Historia e o Futuro de Muros, moderado pola doutora en Turismo pola UDC Iria Caamaño Franco e coa participación do catedrático en Historia Moderna pola USC Isidro Dubert García e o licenciado en Filoloxía pola USC Alfonso Blanco Quintela.
Como broche final ás xornadas, a Escola Municipal de Música de Muros ofrecerá o concerto Cine París en Concerto: Melodías dunha Época, unha homenaxe musical que porá o peche a esta primeira edición da Semana da Historia de Muros.
