Non son barreiras contrarias á instalación en Palas de Rei da polémica fábrica téxtil: esas barreiras xa estaban “aí” antes de que a industria portuguesa fixera pública a súa pretensión de vir a Galicia. De calquera xeito, Altri tenta beneficiarse das axudas que, por 140 millóns de euros, forman parte do proxecto estratéxico para a recuperación e transformación económica (PERTE) de Descarbonización Industrial. A participación de Altri nesta convocatoria de axudas garda relación co financiamento da súa planta de fibras téxtiles na citada localidade lucense.
A fábrica que se proxecta xa non só esperta sentimentos contrarios na cidadanía galega. É que, amais, “pode producir un impacto paisaxístico considerable”, a criterio do Instituto de Estudos do Territorio, órgano da Consellería de Medio Ambiente encargado do respecto da paisaxe.
Así o revela a web da axencia de noticias Europa Press -á que cita o xornal Praza Pública- cando sinala que este “informe crítico” forma parte do expediente de avaliación ambiental “aínda en tramitación por parte do Goberno galego”.
O “impacto” ao que alude Europa Press apunta directamente á cheminea de 75 metros de altura prevista pola industria, e máis tamén ás dúas caldeiras de 60 e 50 metros da mesma planta industrial. Porén, o Instituto de Estudos do Territorio valora o proxecto se son introducidas no mesmo un total de seis “medidas correctoras” que palíen o seu impacto visual xa que logo as medidas previstas pola empresa para limitar ese impacto son “correctas” mais insuficientes.
Por estes motivos, o Instituto esixe unha análise completa de visibilidade das instalacións máis precisa para o deseño das barreiras vexetais que ocultarán a fábrica, que se empreguen para elo especies autóctonas, que non se utilicen materiais reflectantes, que se minimicen as alteracións da topografìa e se respecten os valados tradicionais, que se reduza a contaminación lumínica e que o punto de vertedura de auga ao río Ulla respecte a paisaxe desa zona.
Agora queda pendente a recepción por Medio Ambiente doutros informes sectoriais analizando diversos aspectos do impacto da fábrica para, coñecido o conxunto, tomar unha decisión sobre se autoriza ou non o proxecto.
Son, en definitiva, argumentos que dan máis valor á posición contraria a Altri en Palas de Rei, da maior parte da veciñanza e de distintos sectores, nomeadamente os mariñeiros, mariscadores e agrícolas/gandeiros.
