Moitos somos conscientes de que a maneira en que utilizamos a auga e a enerxía, a forma en que deseñamos as nosas casas e recollemos os residuos, se gozamos ou non dos nosos xardíns e dos parques naturais que nos rodean, todos estes son factores que afectan o noso mundo, no que habitamos e queremos que sigan vivindo as futuras xeracións.
Hai moita xente consciente de que é necesario protexer o planeta pero hai outra que non mira máis aló e manteñen uns malos hábitos ambientais. Así non hai máis que pasearse, a calquera hora do día ou da madrugada, por algunha zona portuaria e observamos como, a pesar de existir diversos contedores de cor verde, azul e amarelo; os plásticos, botellas, redes, caixas …, son “esquecidas” en calquera lugar preto da beira do mar onde, inevitablemente, terminan caendo e danando o ecosistema.
Os mariñeiros, pescadores, redeiros, armadores, comercializadores, exportadores e calquera outro tipo persoa ou colectivo que realice labores marítimos, directa ou indirectamente, temos que ter uns comportamentos máis respectuosos coa contorna para evitar a proliferación dos anacos de caixas, redes, metais, así como de plásticos que deambulan, co vento, por todas as zonas portuarias dos nosos pobos e cidades e que son moi contaminantes para o ecosistema mariño. Aí os responsables dos portos pesqueiros, comerciais ou deportivos, teñen moito que dicir e non escudarse en que eles cumpren con facilitar, gratuitamente, os contedores sen máis.
