Está a falarse moito de desigualdade entre cidadáns españois, segundo a Comunidade Autónoma na que resida. En España, nunca houbo unha igualdade real entre españois. O triángulo formado polas cidades de Bilbao, Barcelona e Madrid foron os máis beneficiados da maioría dos investimentos e da riqueza do noso país.
Catalunya, Euskadi e Madrid foron e son as comunidades autónomas máis ricas de todo o territorio nacional. Non nos esquezamos que, desde Galicia, Andalucía ou Estremadura cando alguén desexaba buscar emprego na pel de touro marchaban a Euskadi, Catalunya ou a capital do estado. Alí é onde había máis emprego de calidade, mellores condicións laborais e maiores salarios.
Co paso do tempo, en Galicia pouco cambiou a situación, ao continuar sendo unha das comunidades menos prósperas do estado, a pesar de levar gobernando o mesmo partido político, con maiorías absolutas, ao longo de corenta anos. Cal podería ser o problema? A resignación, a falta de loita e reivindicación.
Os gobernantes da Xunta de Galicia sempre presumiron que en Galicia reinaba a tranquilidade e a moderación, aínda que algúns cremos que foron demasiado compracentes, calados, submisos e obedientes cos mandaríns do Estado, moito máis cando coincidían coa súa mesma ideoloxía política. Así nos loce o pelo á maioría de galegos que teñen que volver emigrar se, en realidade, queren poder vivir do seu traballo.
