O proxecto A Memoria de Cabo de Cruz, impulsado pola asociación de tradicións mariñeiras A Gamela do Cabo da Cruz (Boiro) co apoio e financiamento dos Grupos de Acción Costeira Local do sector Pesqueiro (os GALP), achega este verán importantes novidades no seu obxectivo de recuperar e reivindicar a historia da parroquia boirense do Castro (Cabo de Cruz), e das súas xentes. Segundo informaron dende a dita asociación, dende esta semana xa se pode visitar a primeira parte deste proxecto que, nun plano máis concreto, envórcase en divulgar o patrimonio inmaterial do pobo de Cabo de Cruz vencellado ao mar e aos seus oficios e a importancia da muller no desenvolvemento da historia, reivindicando a importancia do seu papel, as dificultades ás que se enfrontaron e os avances acadados no desenvolvemento das zonas costeiras.
Dúas fases
O proxecto de arquivo histórico ten varias fases: dende a recollida de material gráfico e histórico do lugar (fotografías, documentos ou audiovisuais antigos) á gravación de testemuñas da memoria aínda viva nas persoas maiores, pasando por actividades de creación artística urbana e iniciativas de comunicación dixital. De feito, na primeira fase inclúense dúas intervencións de rúa: por unha banda un mural realizado por Xoana Almar e Miguel Peralta de Cestola na Cachola nas paredes da Lonxa de Cabo de Cruz que xa se pode visitar (e dende A Gamela fan un chamamento a contemplar in situ o mural en cuestión), e pola outra unha nova creación artística que se dará a coñecer a finais do mes de setembro e que consistirá na colocación de 20 fotografías históricas impresas en aluminio para facer unha exposición permanente polos lugares históricos de Cabo de Cruz.
O proxecto inclúe tamén a creación dunha web, gamela.org, que servirá de soporte dixital para aloxar o material fotográfico e os documentos cedidos pola veciñanza e os vídeos realizados cos testemuños e a memoria das mulleres que viviron ese tempo, ese xeito de vida, o campo, os barcos… En definitiva, nesta web temática os usuarios poderán ver as fotos, os documentos e os vídeos resultantes do proxecto, publicacións en papel e soportes dixitais, redes sociais, etc.
A Gamela pretende con este proxecto “cumprir co obxectivo da asociación de recuperar e poñer en valor do patrimonio do lugar, comezando polas embarcacións tradicionais e a cultura marítima pero tamén, por suposto, no entorno social e cultural co que estas embarcacións están relacionadas”.
Quen queira contribuír ao desenvolvemento do proxecto pode enviar propostas e materiais a través do teléfono 646 833 730 (Pablo) e do correo gamelacabodecruz@gmail.com.
