O responsábel de Deportes da Deputación da Coruña, Antonio Leira, e o alcalde de Padrón, Anxo Rei Arca, participaron este luns 26 de agosto en Padrón nas Rutas en Bici Eléctrica. O evento artéllase a través de varias marchas non competitivas na que 60 persoas, circulan pola contorna do río Sar e o monte San Gregorio.
O obxectivo desta actividade é dar a coñecer á poboación do concello e da comarca o funcionamento das bicicletas eléctricas e, así, promover o seu uso.
Segundo destacaron Leira e Rei, os beneficios da bici de batería non só teñen que ver coas súas posibilidades como medio de mobilidade persoal sostíbel, xa que reducen a contaminación atmosférica e acústica, senón que tamén “axudan a fomentar a práctica deportiva sen precisar dunha elevada condición física”.
A iniciativa circunscríbese dentro das actividades vinculadas á 11ª etapa de La Vuelta a España. Unha das probas ciclistas máis importantes do mundo chegará á provincia o mércores 28 de agosto nunha etapa na que o Campus tecnolóxico Cortizo de Padrón será punto de saída e de chegada.
