Os concellos de Barbanza Arousa (Ribeira, A Pobra, Boiro e Rianxo) veñen de mostrar o seu rexeitamento ao incremento do canon de SOGAMA, a empresa titularidade da Xunta (51%) e da eléctrica Naturgy (49%) que xestiona os refugallos de case 300 concellos galegos, que anunciou estes días unha suba das súas tarifas, algo “prexudicial para a veciñanza” segundo informan dende os gobernos locais da beira sur do Barbanza.
Lembran que a proposta de incremento do canon prevese en dúas etapas durante o ano 2024, a 68,05 por tonelada de xaneiro a xuño e a 88,05 de xullo a decembro. Fontes municipais consideran que “é unha medida de dubidosa legalidade porque se aplica de maneira arbitraria a algúns concellos” e “faise sen antes cambiar a lei pola que se aprobou a bonificación do 15% que tiñan os concellos que levaban a cabo medidas positivas no ámbito da recollida separada dos biorresiduos”. Segundo din, esta medida “obrigará aos concellos a aprobar modificacións das ordenanzas fiscais porque as novas taxas téñense que repercutir nos recibos que pagan as persoas usuarias”.
Dende os consistorios de Ribeira, A Pobra, Boiro e Rianxo recriminan que a Xunta “vaia castigar á veciñanza pero tamén aos concellos aos que lles vai detraer do Fondo de Cooperación Local 9 millóns de euros para financiar unha parte desa suba, prexudicando o financiamento que teñen as propias entidades locais”.
Dende os gobernos locais cren que “é preciso apostar por un modelo de xestión dos residuos que sexa sustentábel e que non cause un prexuízo ás economías municipais nin teña un aumento de custes para as veciñas e veciños” polo que lle piden á Xunta de Galicia que reconsidere esa medida e sente a falar cos municipios no seo da FEGAMP para acadar consensos no ámbito da xestión dos residuos.
