É curioso: o sector pesqueiro leva anos pedindo ao Goberno que aplique un IVE (Imposto do Valor Engadido) reducido aos produtos da pesca, demanda que nunca foi atendida malia as evidentes consecuencias negativas desa medida: os prezos do peixe disparáronse e o consumo deste alimento esencial baixou significativamente. Ata tal punto, que o ministro de Agricultura, Pesca e Alimentación, Luis Planas, ven de anunciar que dempois do verán o seu ministerio levará a cabo unha campaña de promoción para fomentar o consumo de peixe, resentido nos últimos anos.
Non vou dicir o tan socorrido “tarde piache”, máis teño gañas de pronunciar en alta voz tal dito. Talvez no ministerio do señor Planas non se decataron ata o de agora que o prezo do peixe tivo como consecuencia a redución do seu consumo?. Saben no MAPA que baixou o consumo de froita, de leite, de aceite pola suba experimentada nos seus prezos e mantense a baixa do IVE; pero non nos produtos pesqueiros que, por máis que suban para o consumidor, estas non repercuten nos prezos de venda en lonxa e, polo tanto, os pescadores seguen a velas vir.
Non se desbota a posibilidade de que no seo da Comisión Europea sexa nomeado un Comisario ou Comisaria de Pesca, o que sería un recoñecemento explícito do valor e a importancia que a Pesca ten na UE. Pero ninguén fala de que en España se faga o mesmo. Pode ser Luis Planas un candidato a ese comisariado de Pesca comunitario para compensar o retorno a España de Josep Borrell?.
Si, como se comenta, existe a posibilidade do nomeamento dun comisario de Pesca da Unión Europea, Planas conta con moitos avais que poñer riba da mesa. Podería ser un galego da provincia de Pontevedra quen o substituira como ministro de Pesca se, por fin en España se crea este Ministerio á imaxe e semellanza da CE?.
Queda formulada a pregunta. Hai tempo para a resposta.
