A XXXV edición do Gran Prix das Carrilanas de Esteiro celebrará ese sábado a súa segunda xornada, na que os vehículos sen propulsión tomarán a alameda e as bandas Sidecars, The Rapants, Capital Voskov, Galician Army, Quinkillada e a DJ Bea Fernandes porán a música desde o mediodía e até a madrugada no marco do Festival das Carrilanas, cuxa entrada é de balde.
A alameda de Esteiro acollerá o groso da actividade deste sábado 20. Alí, desde as 11.00 horas e até as 22.00 da noite, o Mercado de Artesanía, no que participan máis dunha ducia de entidades, terá as súas portas abertas á veciñanza. A partir das 12 comezarán as propostas dirixidas ao público infantil, con xogos populares, obradoiros, animación e o espectáculo Abracadaver, da compañía AsSircópatas; e ás 13.30 a formación Quinkillada inaugurará o Escenario Vegalsa-Eroski.
Na mesma alameda, tamén ao mediodía, abrirase o período de inscrición para participar no Gran Prix do día 21, no que os vehículos, pilotados por público de todas as idades, descenderán polo circuíto de O Maio divididos en tres categorías: infantil, carrilanas lentas e carrilanas rápidas. O proceso de inscrición inclúe a verificación dos vehículos creados para a ocasión, así como o inicio da exposición dos mesmos. Xa ás 19.00h terá lugar a proba Pole Position para as carrilanas que participen na competición rápida.
Pola noite, a música será a gran protagonista coa segunda xornada do Festival das Carrilanas. O palco principal, nomeado Escenario Vibra Mahou, acollerá, a partir das 21.15 horas, os concertos de Capital Voskov, Sidecars, The Rapants e Galician Army. A DJ Bea Fernandes amenizará os tempos de espera entre cambios de bandas desde o Escenario Artón, situado ao carón do primeiro.
Gran Prix das Carrilanas de Esteiro
O Gran Prix das Carrilanas de Esteiro é un dos eventos de referencia do verán galego e xira arredor da promoción e posta en valor das carrilanas, vehículos artesanais, feitos de madeira, que descenden sen axuda de motor polo circuíto local O Maio. A singularidade desta festividade, que mantén viva unha proposta que ten a súa orixe nos xogos populares de tradición galega, fai que o Gran Prix das Carrilanas de Esteiro -declarado Festa de Interese Turístico Nacional no 2021- sexa, alén dun orgullo para a súa veciñanza, unha cita ineludible para as amantes da artesanía, da velocidade e da tradición.
A XXXV edición do GP Carrilanas de Esteiro celébrase até o domingo 21. Carreiras de vehículos artesanais sen motor nas que prima a diversión, obradoiros e xogos infantís, espectáculos de circo, pasacalles e un mercado de artesanía forman parte da programación cultural de balde e dirixida para toda a familia, da que tamén é parte o evento musical Festival das Carrilanas, no que se darán cita nesta fin de semana en Esteiro, entre outras bandas, Tanxugueiras, Sidecars, The Rapants, Xabier Díaz & Adufeiras de Salitre, Mondra e Lontreira.
SÁBADO 20 DE XULLO
De 11.00 a 22.00h Espazo Artesanía | Zona Gastro
De 12.00 a 15.00h Exposición e verificación de Carrilanas | Alameda de Esteiro
De 12.00 a 15.00h Espazo infantil. Obradoiros e animación | Alameda de Esteiro
12.30h Espazo infantil – Espectáculo Abracadaver, de AsSircópatas | Alameda de Esteiro
13.30h Escenario Vegalsa Eroski. Concerto de Quinkillada | Alameda de Esteiro
16.00h Peche do circuíto ao tráfico
19.00h Pole Position | Circuíto Carrilanas
21.15h Festival das Carrilanas | Recinto – Escenario #VibraMahou
20.15h Apertura de portas
21.15h Capital Voskov
22.45h Sidecars
00.35h The Rapants
02.25h Galician Army
*** DJ Bea Fernandes. Entre cambios de bandas | Escenario Artón
