J.C.- A Regata CONGALSA largará amarras este sábado 6 de xullo, nunha nova edición da Volta a Sálvora que organiza o Club Náutico Deportivo de Ribeira (Club Náutico de Riveira). Cunha previsión inicial de máis de 25 veleiros, a cita recupera o protagonismo dos cruceiros na comarca do Barbanza, tratando de cumprir coa tradición na que vai ser a XIII edición da circunnavegación á illa.
Presentada na biblioteca do Náutico, actuou de mestre de cerimonias o seu presidente, José Luis Torres Colomer, quen estivo acompañado pola Directora de Relacións Externas de CONGALSA, Isabel Cañas; o comodoro do club, José Luis Lomba; e os directivos da entidade social e deportiva, Justo Arevalillo e Manuel Muñiz.
“Desde CONGALSA estamos moi ilusionados de patrocinar un ano máis, e xa van 13, unha nova edición esta Regata, que xa é referente na nosa comarca e que reúne a apaixonados do deporte e a vida saudábel, do traballo en equipo e do mar”, dicía Cañas, engadindo que “son tres ámbitos vitais para a nosa empresa e que queremos poñer en valor apoiando este tipo de iniciativas”.
“Querería agradecer a CONGALSA, unha vez máis, a aposta polo deporte, non só neste caso no deporte da vela, senón tamén outras actividades deportivas e sempre dentro do coidado ao medio ambiente e da súa protección”, sinalaba Colomer.
Se a previsión meteorolóxica para este sábado 6 de xullo non falla, a intención do comité da regata CONGALSA, presidido polo xuíz Miguel Cons, é navegar de Norte a Sur o trazado por Sálvora, favorecidos pola compoñente trazando unha baixada lineal con spinnaker, o que achega un factor de seguridade moi importante ao non ter que realizar excesivos bordos de cinguida, manobras que meterían aos veleiros mar dentro.
O top está programado para as 14 horas sendo a entrega de premios ás sete da tarde nas propias instalacións do Náutico de Ribeira.
