Veciños de Escarabote manifestaranse este sábado ás doce e media (12:30horas) para mostrar novamente o seu rexeitamento á decisión do Concello de mudar o nome de “Carretera del Muelle” á céntrica rúa que, como se indica no seu nome, dá acceso ao peirao e ao porto da vila. A veciñanza que impulsa a mobilización di que o Goberno local non atende a petición de volver chamar
polo seu antigo nome á devandita vía, no canto da decisión actual de chamarlle “Pai Joseba”. Lembran tamén que no pleno do 21 marzo, interviñeron no pleno da Corporación presentando medio milleiro de sinaturas para que se restableza o nome orixinal.
Defenden que “todos os topónimos teñen a súa orixe nas características de lugares e dos usos e costumes do pobo” e que “por tradición son os habitantes os que nomean os lugares onde habitan segundo os usos e as características físicas ou
xeográficas dos lugares, e os organismos oficiais respéctano”. E engaden: “Entendemos que o Goberno local con maioría absoluta acepte que se faga un recoñecemento ao Padre Joseba, pero rexeitamos que se impoña o cambio de nome da citada rúa”.
O Concello baseou a súa decisión no feito de que “Carretera del Muelle” é un nome coloquial que non é oficial nin un topónimo tradicional, simplemente un indicativo informal de lugar e de acceso, e que tampouco garante as normas básicas do galego.
