O responsábel de Patrimonio e Contratación na Deputación da Coruña, Xosé Penas, estivo este mércores 5 de xuño no concello de Ribeira onde visitou algúns dos tesouros patrimoniais do termo municipal, como o Dolmen de Axeitos e o Castro da Cidá. Fíxoo acompañado do alcalde, Luis Antonio Pérez Barral, e parte da Corporación municipal.
Posta en valor do Dolmen de Axeitos
Durante a visita, Concello e Deputación analizaron o plan de posta en valor do dolmen de Axeitos, propiedade da entidade provincial, que inclúe melloras nos accesos ao monumento megalítico e na protección da contorna.
Máis polo miúdo, Xosé Penas presentou as propostas da Deputación que consisten nun cambio do sentido da visita para potenciar a carballeira existente e dotar á construción megalítica dun “maior protagonismo creando, ao mesmo tempo, un círculo de seguridade ao redor”.
En palabras do deputado, “o Dolmen de Axeitos é unha xoia megalítica que debemos coidar e potenciar e dende a Deputación da Coruña velamos pola preservación de monumentos patrimoniais como este, que son identidade, cultura e historia do noso país. Por iso estamos traballando na posta en valor do Dolmen de Axeitos e da súa contorna, entre outras actuacións”.
Ademais, o deputado puido coñecer as últimas escavacións arqueolóxicas realizadas no Castro da Cidá, así como todo o conxunto patrimonial da primeira Idade de Ferro.
