O Concello de Boiro achego formación a locais hostaleiros e axentes programadores no marco do protocolo para a prevención das violencias machistas, sexuais e LGTBIfóbicas nos espazos de ocio do concello. Con esta formación o que se pretende é “crear unha rede de espazos seguros e libres de agresións no ocio”.
Participaron nesta formación, que tivo lugar este luns 17 de xuño no Consistorio, locais hostaleiros do municipio como son o bar Fornos, Abadía de San Enrique, La Ubi, Furancho, Gin Lab, Gava e Castelao; así como programadores de ocio como Peñas Boiro AC, Turbina, DJ Matrek e Bacanito Fest, todos eles comprometidos coa campaña de violencia cero no ocio.
Con este protocolo o que se pretende é “mostrar as violencias machistas, sexuais e LGTBIfóbicas que existen co obxectivo de aprender a identificalas e previlas”, sinalaron fontes do Concello, engadindo que “o documento recolle unha explicación dos tipos de violencia, as formas nas que se manifesta e tamén as pautas para a súa detección e como actuar en cada caso, ofrecendo un recurso formativo para locais de hostalaría, asociacións ou entidades para crear unha rede de espazos seguros”.
Ademais destas accións formativas, o Concello de Boiro realiza campañas de difusión e información que estarán orientadas especialmente á mocidade, facendo que a detección e prevención das violencias vaia máis alá dos profesionais e implique a colectivos, entidades e empresas.
