A Pobra do Caramiñal festexa o Día do Orgullo, no 28 de xuño, cunha acción focalizada no ámbito dixital. A Concellaría da Igualdade súmase por sétimo ano consecutivo á campaña Liberdade de ser e sentir!, impulsada pola Deputación da Coruña.
O obxectivo desta campaña é visibiliza-la importancia da tolerancia e a igualdade das persoas, independentemente da súa orientación sexual e identidade de xénero e co propósito de normalizar e sensibilizar á sociedade sobre as diversidades sexuais.
Por iso, nestes días, a Área da Igualdade atópase difundindo material audiovisual nas súas contas de Facebook e Instagram (@igualdadeapobra). “Queremos, así, empregar as redes sociais como unha ferramenta para visibilizar a reivindicación do colectivo LGBTI+ e como un eido máis para a defensa dos dereitos e liberdades”, apunta a edil Estefanía Ramos.
