A portavoz de Educación, Cristina Fernández Davila, reclamou ao Goberno da Xutna que “asuma as competencias que lle corresponden na xestión dos conservatorios e cuxos custos recaen en moitos concellos nos que están situadas as súas instalacións”, sinalou, engadindo que o BNG rexistrou no Parlamento unha iniciativa na que lle demanda á Administración galega que “costee o servizo educativo na súa totalidade, nas áreas de mantemento, dotacións, materiais educativos e instrumentos, persoal docente e non docente”.
Segundo explicou, “na nosa terra polo menos 23 concellos están asumindo competencias que non lles corresponden polos conservatorios”, motivo polo que o BNG reclama que “mentres a Xunta non asuma directamente a xestión e os custes, convoque axudas para os municipios afectados e colabore na substitución ou cobertura de prazas vacantes do persoal docente mediante as listaxes da Consellería de Educación”.
O Bloque reclamou tamén que se “proporcionen as ferramentas informáticas que se precisen” para o servizo.
A responsábel da área de Educación vén de celebrar unha serie de encontros cos representantes dalgúns conservatorios, situados todos eles en concellos “cunha tradición musical relevante”, para recoller información sobre a situación destes centros de formación musical en 23 concellos galegos.
Este xoves tivo lugar unha reunión en Ribeira co alcalde Luís Pérez Barral e a concelleira Antía Alberte, e coa dirección do conservatorio con vistas a avaliar a situación na que se encontra o mesmo, así como os problemas “non só dos alumnos e das familias, senón tamén dos responsábeis da área de ensino, que se ven abocados a xestionar e asumir o custo das instalacións, así como os salarios do persoal docente adscrito ao mesmo”, sinalou.
A encargada da área de Educación xuntouse tamén no Parlamento con representantes dos pais e das nais de Carballo, Culleredo, Betanzos, As Pontes, Arzúa, Melide, Noia e Ribeira.
Fernández Davila considera “necesario que a Administración galega asuma as súas competencias pois a situación actual está a ocasionar prexuízos e discriminacións sobre todo no ámbito rural”, onde é habitual que os usuarios e as usuarias dos conservatorios paguen máis polas taxas da matrícula e mensualidades, un gasto que se suma aos cartos que unha boa parte dos e das estudantes teñen que desembolsar polos desprazamentos até os centros”.
A deputada nacionalista dixo tamén que “hai escaseza de persoal á hora de cubrir as baixas” e sinalou algúns dos 23 concellos que están a asumir a xestión e “o custo practicamente completo dos centros educativos de música, con titulación oficial e regrada, no grao profesional e que dependen da Consellería de Educación”. Trátase, sinalou, de concellos tan diversos como Tui, O Barco de Valdeorras, Vilagarcía de Arousa, Carballiño, Redondela, Ponteareas, Viveiro, Carballo, Cangas ou Monforte de lemos, entre outros.
Segundo explicou Fernández, os concellos que están asumindo a xestión dos conservatorios “non só o fan para a súa veciñanza, pois a estes centros acoden tamén persoas doutros municipios galegos”.
No caso de Ribeira por exemplo o Concello inviste case 700.000€ anuais a manter activo este servizo, lembrou.
Na iniciativa rexistrada no Parlamento, o BNG reclama tamén a creación dunha rede de conservatorios profesionais de música, “agrupando os centros por comarcas, de acordo a criterios de proximidade, así como de poboación total, tendo en conta unha oferta equilibrada territorialmente”.
