O alcalde de Boiro, José Ramón Romero, e a concelleira de Ensino, Carmen Silva, recibiron este luns 3 de xuño, no Consistorio, ao alumnado de Santoña e Alcolea del Tajo que se atopan no termo municipal para realizar unha xornada de intercambio co CEIP de Abanqueiro.
O alcalde e a concelleira déronlles a benvida a Boiro, onde van estar catro días desenvolvendo actividades para coñecer a cultura e as tradicións locais así como lugares da comarca e a contorna. O alcalde animou aos rapaces e rapazas a que “desfruten destes días en Boiro e de todas as propostas que o profesorado ten preparadas para coñecer a nosa contorna”.
No itinerario previsto para estes días inclúese a realización de actividades para favorecer a convivencia, así como outras propostas lúdicas como unhas xornadas de deporte de volei ou piragüismo. Visitarán tamén espazos da comarca como o Castro de Baroña, o Faro de Corrubedo ou as Dunas de Corrubedo.
A concelleira de Ensino, Carmen Silva, valorou moi positivamente esta proposta que “favorece as relacións entre o alumnado de distintos centros de ensino e que lle permite aos nosos rapaces non só coñecer outros lugares senón tamén amosarlles aos visitantes o noso pobo”.
