Nos últimos tempos a clase política de ideoloxía extremista, principalmente da dereita, perderon toda a vergonza a manifestarse en público e a largar todo tipo de soflamas en contra dos principios e dereitos fundamentais de calquera sociedade. Queren volver ás catacumbas e aos tempos escuros da historia da humanidade.
Moita xente, principalmente de barrios humildes, déixanse engaiolar por eses encantadores de serpes. Estes videntes frustrados queren trasladar o caos, ante unhas sociedades cada vez máis desiguais que ven como moitas das súas demandas e reivindicacións nunca se trasladan á realidade.
Padecen as consecuencias das desigualdades e as inxustizas, traballando de sol a sol, non poden chegar a fin de mes, mentres outros especuladores e vividores privilexiados están a corpo de rei.
Estes novos exércitos de ideas trasnoitadas están ao servizo dos sectores privilexiados, como as grandes empresas, o poder financeiro e unha parte importante do poder xudicial. Móvense no seu mundo particular, non entenden nin queren saber nada sobre a alternancia política, eles non queren perder os seus privilexios e utilizan a boa fe das clases máis desfavorecidas e vulnerables.
No século XXI non pode negarse a violencia machista, a Xustiza Social, a pobreza, a desigualdade social, ás comunidades autónomas, á Unión Europea, os impostos, os dereitos laborais, ás centrais sindicais e un longo etcétera de cuestións que foron instituídas, grazas á loita de millóns de persoas, ao longo dos séculos pasados. Cunha linguaxe tabernaria pretenden conseguir o poder para utilizalo en beneficio propio.
