O mesón-asador da praia do Vilar, en Ribeira, recibiu esta semana, na madrugada deste mércores, o ataque de dous cócteis molotov: dous obxectos incendiarios con feitura de botes de cristal con combustíbel no interior que causaron diversos estragos no interior e no exterior do establecemento (roturas nos vidros das xanelas e rastros de material queimado e ennegrecido no interior). Logo de informar dos feitos á Policía Nacional (durante a mañá do mércores, en canto o empregado chegou ao local para iniciar a súa xornada de traballo) os axentes puxeron en marcha os traballos de investigacións, dirixidos a dar coa autoría da persoa ou persoas que perpetrou o ataque.
Segundo confirmaron os axentes ao Diario de Arousa, foron dous os obxectos incendiarios guindados contra o establecemento, un lanzado contra a porta acristalada posterior e outro contra un dos accesos á cociña. Tamén confirmaron que ningunha das bombas conseguiu o seu obxectivo de facer arder o local, xa que o lume non se propagou a ningún dos moitos obxectos inflamábeis que se atopaban no interior do mesmo. O propietario expresou a súa fonda inquietude polos feitos, mostrando o seu temor a que se repitan os feitos durante a tempada de verán, que é crucial para a actividade do mesón.
