Mulleres Salgadas entregará o vindeiro venres día 28 de xuño o seu Premio Muller Salgada 2024. O acto, que conta coa colaboración do Concello de Rianxo, terá lugar ás 18.30 no Auditorio de Rianxo (A Coruña).
A orixe do galardón
A cultura do esforzo xeneroso, descoñecido, das mulleres do mar levou no año 2020 á Asociación de Mulleres Salgadas a crear o Premio Muller Salgada, de carácter anual. “Con el queremos render unha merecida homenaxe ás mulleres do mar, anónimas, descoñecidas polo público en xeral, que desde o seu labor sacrificado, solidario, positivo, contribuíron de maneira innegábel ao desenvolvemento e progreso das profesións do mar, facendo avanzar as condicións laborais, económicas e sociais do sector pesqueiro”, sinalan dende a entidade.
Nesta edición, a asociación galega de mulleres do mar entregará o premio a catro mulleres traballadoras da confraría de Rianxo:
• Amelia Caamaño Otero, bióloga.
• Mónica Méndez Somoza, secretaria.
• Rocío Rodríguez Sabugueiro, administrativa.
• Ana Belén Fernández Dios, administrativa.
A elección das premiadas busca amosar “o importante traballo que realizan as mulleres que traballan nas confrarías, visibilizar que moitos deses postos son ocupados por mulleres e resaltar a importancia do traballo en equipo e a asesoría técnica e científica”, explican dende Mulleres Salgadas, engadindo que “a nosa asociación quere facer un recoñecemento público a secretarias, biólogas, administrativas, lonxeras, etc. e poñer en valor a súa contribución ao resto da cadea”.
E engaden: “O sector pesqueiro, a xente do mar, necesítaas e son traballadoras esenciais nun momento difícil para moitas confrarías, que precisan máis que nunca os servizos de apoio que elas brindan”.
