Os centros de saúde de Ribeira, entre os que se incluíu o de Santa Uxía (na imaxe) acolleron na xornada deste venres 14 de xuño concentracións veciñais para reclamar unha meirande dotación de persoal médico. Segundo explicaron os cidadáns reunidos nos ambulatorios, o incremento dos facultativos é fundamental para “evitar demoras e garantir unha boa atención á poboación”.
Membros do Goberno municipal de Ribeira estiveron presentes para mostrar o seu apoio. Lembraron que “dende o Executivo de Ribeira temos solicitado unha reunión coa Consellería de Sanidade para tratar de solucionar os problemas que hai nos centros sanitarios do municipio tanto a necesidade de cubrir todo o persoal de baixa e as vacacións, como as necesidades de mellora dos edificios”.
