O sábado 29 de xuño vaise presentar no Centro Social de Boiro a revista Folía, que é a publicación que acompaña as Festas do Verán 2024. Será ás 12.00 horas no CS de Boiro. Segundo adianta o Concello, impulsor da publicación, a revista estará este ano adicada a un dos grandes puntais económicos do municipio: o sector téxtil.
A revista, como de costume, poderase conseguir na Oficina de Turismo do Concello de Boiro e nos Centros Sociais de Boiro, Cabo de Cruz e Escarabote.
Por certo que tamén o pregón das Festas de Boiro será unha homenaxe ás importantes contribucións das empresas téxtiles locais ao desenvolvemento do concello: será o venres 5 de xullo e a través deste acto conmemoraranse “as moitas xeración de mulleres que se dedicaron en Boiro a este tecido produtivo nas catro fábricas que tivemos, as factorías Madó, Maperlán, Permist e Jealfer, e que fixeron de Boiro un lugar destacado gracias a este feito socioeconómico”, adiantou o alcalde, José Ramón Romero, na presentación do programa das Festas.
