Este domingo celebrouse en Outes unha nova andaina de primavera de programa de roteiros Coñece o noso patrimonio. Desta volta foi a quenda do itinerario Torre dos Mouros e fervenzas de San Paio. Participaron arredor de trinta camiñantes.
A vindeira andaina, Historia ás beiras do río Bendimón, celebrarase o vindeiro domingo 9 de xuño e o prazo para inscricións comeza este mesmo luns 27 de maio.
Máis información na páxina web: outes.gal ou na aplicación móbil Outes Informa.
O ciclo de camiñadas Coñece o noso patrimonio, organizado polo Concello, vai destinado (como se indica no seu título) a desvelar os segredos e tesouros ambientais, culturais, patrimoniais e paisaxísticos do termo municipal.
As camiñadas comezaron o 14 de abril no Centro Náutico do Freixo con Historia do Freixo e Rego do Rial, de dez quilómetros de percorrido. O domingo 28 medio cento de camiñantes participaron nun roteiro para coñecer as orixes do concello de Outes e o día 12 celebrouse a andaina San Miguel de Valadares e montes de Lantarou, con saída da igrexa de San Miguel de Valadares.
Como dixemos, o día 9 de xuño toca coñecer un dos principais cursos fluviais do territorio a través de Historia ás beiras do río Bendimón. A saída será ás 9.00 horas dende o aparcamento da igrexa de Roo ás 9.00 horas.
O día 23 de xuño péchase a axenda de camiñadas con De Mirás a Carleo polo Cristo de Baneo, con saída ás 9.00 horas da capela do Socorro e 7,5 quilómetros de percorrido.
