Se para o sufrido oficio de escribir sen pelos na lingua (feliz día da Lingua, meus amigos!) houbese distincións de soles (e penso como exemplo nas estrelas do mundo gastronómico), hoxe, vós, teriades cinco soles coma cinco casas. Como a vosa irmá maior, Código Cero tería vintecinco follas de loureiro que farían coroa de honra e resistencia polos seus vintecinco anos.
Parabéns, benqueridos compañeiros, polo feliz aniversario que hoxe entoamos convosco, na seguridade de que Galicia precisa da vosa presenza activa, e o país é máis grande canto máis libre e canto máis diverso é o mundo tanxible ou intanxible da comunicación.
Por outros cinco anos con forza, ilusión e éxitos, por cinco veces outros cinco, e que despois sigan a pedir os que daquela teñan a responsabilidade de facer país verso a verso, pantalla a pantalla, libres e -como quería Díaz Castro – “cos ollos abertos ao mencer”.
Desde a Terra Chá ata O Barbanza, apertas fraternas, e que a información libre nos acompañe e nos inspire.
Xulio Xiz.
