O Concello de Outes vén de manifestar a súa preocupación porque, a piques de comezar a tempada de verán, a Xunta de Galicia aínda non publicou a convocatoria para a contratación de socorristas por parte dos municipios. Segundo informou o alcalde, Manolo González, hai varias semanas que saíu publicado en prensa que a convocatoria para que os concellos poidan contratar socorristas pasaba a ser xestionada pola consellería de Presidencia, Xustiza e Deportes, que dirixe Diego Calvo e que pronto se publicaría. “Esta mesma semana comunicóusenos que a convocatoria sairía en breve pero se temos en conta os prazos legais para que a Xunta resolva, así como o proceso posterior para que os concellos contraten, vai ser moi complicado que as nosas praias conten co servizo de socorrismo antes de mediados de Xullo”, indicou o mandatario outense.
