Tralo éxito de participación das últimas actividades convocadas noutras localizacións do Barbanza, o Laboratorio Ecosocial do Barbanza presenta cinco novas xornadas de voluntariado para eliminar especies exóticas invasoras e recuperar o bosque autóctono nos montes de Rianxo e outros puntos da comarca.
A data máis próxima é este sábado 11, cando terá lugar nos montes de Araño unha xornada de eliminación de acacias.
Segundo informan dende o Laboratorio Ecosocial do Barbanza, impulsado pola Fundación RIA, esta xeira de traballo participativo permitirá as persoas voluntarias aprender a descascar acacias para evitar a súa proliferación no monte e a realizar traballos de consolidación das masas de arborado nativo.
Montescola –entidade a cargo das actividades de prospectiva comunitaria, voluntariado e educación medioambiental do Laboratorio– conta coa colaboración nesta xornada da Comunidade de Montes Veciñais en Man Común do Araño e do Concello de Rianxo para a súa difusión.
A actividade comeza ás 9.30 da mañá e está aberta a todos os públicos e idades. É necesaria inscrición para participar, que deberá realizarse enviando un mail a info@montescola.org antes do xoves 9. Ao rematar os traballos ofrecerase xantar de albaroque para as persoas participantes.
Organiza Montescola, a través do Laboratorio Ecosocial do Barbanza, coa colaboración da CMVMC do Araño e o apoio da Fundación Biodiversidad del Ministerio para la Transición Ecológica y el Reto Demográfico (MITECO).
Ademais de en Araño e sen saírnos do territorio rianxeiro, tamén están programadas xeiras de traballo voluntariado nos montes de Leiro e Taragoña.