Como xa é habitual por estas datas, a Asociación de Amas de Casa, Consumidores e Usuarios Caramiñas bota a andar un novo Festival Caramiñas, que conta coa colaboración da Concellaría da Cultura da Pobra do Caramiñal.
Terá lugar no domingo 5, ás 20.00 horas, no Teatro Cine Elma, se ben a apertura de portas será ás 19.30 horas.
Baixo o nome Tradición e Luísa Villalta, esta xornada de canto, baile e música tradicional da Escola de Baile e Pandeireta Caramiñas estará precedida dunha introdución á vida e obra da poeta, ademais de lles dar lectura a poemas durante o transcurso desta actividade.
Ao coincidir co Día da Nai, faráselles tamén unha homenaxe ás nais. Participará, así mesmo, o grupo de música tradicional Caraveiros.
Con respecto a isto, a concelleira da Cultura, Patricia Lojo, manifestou que se trata “dunha cita tradicional como antesala á programación polo Día das Letras Galegas, poñendo o foco, con esta acción, na nosa música”.
A entrada é libre ata completar a cabida.
