O Concello de Boiro recibiu da Deputación da Coruña unha subvención por importe de 20.000 euros para o financiamento do gasto de persoal das oficinas de turismo da provincia no ano 2024. A finalidade desta liña de subvencións é fortalecer e profesionalizar o sector turístico.
Boiro conta cunha oficina de Turismo, situada no andar baixo da Casa Consistorial, aberta durante todo o ano e que recibe visitantes de xeito continuado, especialmente durante a época estival.
Ademais da información concreta do municipio e a contorna, a Oficina de Turismo de Boiro serve como punto de información do Xeodestino Barbanza Arousa e a provincia da Coruña en xeral.
O persoal de Turismo encárgase de desenvolver as actividades que se realizan durante o verán, así como atender as instalacións turísticas e ofrecer información ás persoas visitantes. Ademais, dende a Oficina de Turismo realízase a promoción do Camiño A Orixe a Santiago de Compostela con información e tamén actividades específicas para dalo a coñecer.
Boiro recibe uns 3.000 turistas no verán que se benefician dos servizos da Oficina de Turismo, así como arredor dunhas 15.000 persoas que, ao longo do ano, visitan a páxina web de turismo e se serven dos recursos que se prestan e se interesan polo destino.
