Os bombeiros do parque comarcal provincial de Boiro, recibiron unha chamada ás 20:22 horas da tarde de onte, xoves 9 de maio, alertando de que unha persoa resultara atrapada por un motocultor co que estaba a traballar no lugar de Asadelos, na parroquia rianxeira de Asados.
Á chegada ao lugar, a persoa ferida atopábase consciente e coa perna esquerda atrapada polas láminas do apeiro. Mentres chegaban ao lugar as asistencias sanitarias, os bombeiros desprazados, tanto dos parques de Boiro como de Ribeira, retiraron as láminas metálicas para comprobar o estado da perna. Ademais, tamén se retirou parte do pechado de madeira para incrementar o acceso ao lugar.
Unha vez chegado o persoal sanitario, procedeuse á sedación da persoa ferida para poder liberar por completo a perna atrapada e trasladar a persoa ata a ambulancia.
No operativo participaron tamén a Policía Local de Rianxo, o 061, bombeiros de Ribeira e voluntarios de Protección Civil de Rianxo.
