Achégase o Día das Letras Galegas (este venres 16 de maio) e os Concellos da nosa comarca son un fervedoiro de actividades conmemorativas e de homenaxe a Luísa Villalta, festexada na edición deste ano. Por exemplo o Concello de Dodro, que celebrará as Letras Galegas durante o mes de maio. A primeira destas propostas é o contacontos Fogares de cores de Iolanda Eiras, este xoves16 de maio, ás 17.30 horas, na Casa da Cultura de Dodro.
O venres 17 de maio, ás 17.30 horas, o CPI de Dodro acollerá a presentación da obra gañadora do XXXVI Premio de Poesía Eusebio Lorenzo Baleirón, As palabras do sur, de Manuel López Rodríguez. No acto acompañarán o autor representantes da editorial Chan da Pólvora, encargada do deseño e impresión do poemario, representantes municipais, familiares e veciños. O público asistente recibirá como agasallo un exemplar do libro premiado e desfrutará dun evento amenizado coa música e a poesía.
O martes 21 celebrarase a inauguración da exposición fotográfica Escenas da memoria de Dodro. Esta mostra reúne imaxes antigas da vida comunitaria do municipio e poderá visitarse de luns a venres entre ás 9.00 e as 14.00 horas na Casa do Concello.
A programación do mes das Letras Galegas rematará o venres 24 de maio, ás 17.30 h, na Casa da Cultura coa representación da obra Isaura e Tristán. Contastorias, de Inacio Vilariño de Fantoches Baj. Trátase dunha peza teatral de monicreques para público familiar baseado na novela de Luísa Villalta As chaves do tempo.
