A directora xeral de Xuventude, Lara Meneses, acompañou este martes 21 de maio a unha vintena de mozos e mozas nunha visita ás instalacións da empresa CONGALSA, na Pobra do Caramiñal, referente galego e estatal no sector da alimentación vencellada aos produtos do mar e da innovación, a transformación e a responsabilidade social empresarial.
A estadía de Meneses en CONGALSA encadrouse no programa Mentoring impulsado pola Xunta de Galicia co obxectivo de asesorar e formar a xuventude na súa transición á vida laboral tras rematar os estudos de grao ou Formación Profesional.
Na súa visita a directora xeral puxo en valor este programa da Consellería de Cultura, Lingua e Xuventude pola a súa “importante contribución e valía” á hora de conseguir “mellorar a empregabilidade da xuventude”. Sinalou que a mocidade participante conta en todo o proceso cun equipo de titores que achega acompañamento e asesoramento, incluíndo visitas a empresas como a deste martes en CONGALSA “para coñecer de primeira man o funcionamento e dinámicas desta empresa de alimentos precociñados ultraconxelados que conta con 30 anos de historia”.
Así mesmo, este programa desenvolve iniciativas, como xornadas de networking ou encontros con mentores de empresas dos sectores profesionais aos que os participantes se queren dedicar.
Lara Meneses explicou que as visitas ás empresas son “parte fundamental” deste programa, do que lembrou que xa vai pola quinta edición e do que destacou que xa teñen pasado “1.200 persoas mozas cun exitoso resultado de inserción laboral”.
“Con estas visitas o que se busca é achegar os participantes ao tecido empresarial galego, proporcionándolles información práctica sobre os sectores profesionais do seu interese”, valorou a directora xeral da Consellería de Cultura, Lingua e Xuventude, quen tamén agradeceu a CONGALSA a súa participación no Programa Xuventude Mentoring desde un principio.
O programa está cofinanciado polo Fondo Social Europeo na Iniciativa de Emprego Xuvenil, nun 80%, con cargo ao Programa operativo de emprego xuvenil, para o período 2014-2020.
