A Asociación Saúde Mental A Creba, entidade inclusiva con actividade na comarca do Barbanza, realizou este mércores unha homenaxe a Luísa Villalta, poeta coruñesa homenaxeada este ano con motivo do Día das Letras Galegas (este venres 17 de maio).
A entidade realizou esta iniciativa buscando implicar o máximo posíbel á comunidade da Creba na actividade cultural deste mes de maio e na celebración dunha lingua, o galego, que é o idioma vehicular da actividade da Creba e de boa parte das e dos seus integrantes.
Eran as 12:00 horas, cando no Centro Cultural Lustres Rivas de Ribeira arrancaba unha lectura de poemas, da autora coruñesa homenaxeada pola RAG este 2024, a cargo dos usuarios e usuarias das entidade. Rosa, Lucas, Ramón, Verónica, Iván, Miriam, Xoán, Sesé, Iván e Carlos encargáronse de poñer voz a distintos poemas de Luísa Villalta. O acto foi conducido por Francisco Javier Gómez González, traballador social de A Creba e incluso se uniu a recitar Ali Padín, técnica de Normalización Lingüística do Concello, para pechar o recital, Alba Blanco Allo, educadora social da entidade, cantou Negra Sombra, o que deixou ao público abraiado.
O broche final foi a cargo de Isabel Fernández Lema, secretaria de A Creba, que dixo sentirse “moi orgullosa” de colaborar e formar parte da xunta directiva, “adicando o meu tempo a asociacións como esta”. Felicitou ás usuarias e usuarios polo seu traballo nesta semana das Letras Galegas e destacou que o colectivo de saúde mental comparte os valores de Luísa Villalta, que son “os de humanidade e defender ás persoas máis débiles e vulnerábeis”.
Finalmente Antía Alberte, concelleira de Cultura; Francisco Suárez-Puerta, segundo tenente de alcalde e Cruz Rivadulla, concelleira de Educación, Igualdade e Diversidade, sinalaron que “este é moi probábel que sexa un dos actos máis importantes que se van celebrar estes días, debido a ser protagonista un colectivo ao que tan poucas veces se lle dá visibilidade”. Os/as edís sumáronse a recitar uns versos e comprometeron a colaboración do Concello coa Creba, que sempre “terán a porta aberta e apoiarán sempre que poidan, aínda que a situación económica actual non é a que desexemos”, sinalaron.
