Os centros de coworking da Pobra e Boiro participaron en Santiago na xuntanza de espazos colaborativos da provincia

11 Abril 2024

A Cámara de Comercio de Santiago de Compostela foi a sede da VI Reunión de Coordinación da Rede Provincial de Coworking, que tivo lugar estes xoves 11 de abril no Coworking Dixital CCompostela. O evento contou coas intervencións de Rosa Ana García, deputada da Área de Emprego da Deputación da Coruña, e María Pais, presidenta da Cámara de Comercio de Santiago, que ofreceron as súas reflexións finais e agradeceron a todos os participantes a súa contribución ao éxito no funcionamento destes espazos de traballo.

A xuntanza reuniu ademais aos representantes dos once espazos de traballo colaborativo de toda a provincia da Coruña (dirixidos a velar polo emprendemento ofrecendo instalacións e asesoramento axeitados, apoio e acceso a outros profesionais, empresas e mercados), que participaron nunha xornada de intercambio de coñecementos e experiencias, así como na discusión de temas relevantes para a comunidade emprendedora e empresarial.

O caso da Cámara compostelá

A Cámara de Comercio de Santiago de Compostela puxo en valor os datos do seu Coworking Dixital CCompostela, posto e marcha o ano pasado co obxectivo de fomentar proxectos dixitais de persoas emprendedoras e startups e impulsar a transformación dixital de pemes e micropemes da demarcación da Cámara de Comercio de Santiago. No exercicio 2023 asesorou de forma personalizada a 96 emprendedores, executou 50 accións formativas cun alcance de 580 asistentes e incubou 9 proxectos empresariais. Para todo isto contouse co apoio económico da Deputación da Coruña a través da Rede Provincial de Espazos de Traballo, da Fundación INCYDE a través do Fondo Europeo de Desenvolvemento Rexional e de cara ao ano 2024 o proxecto contará ademais coa colaboración do Concello de Santiago que se une ao apoio aos proxectos empresariais e aos emprendedores que se xestionarán desde o coworking da Cámara compostelá.

Despois dunha visita guiada ás instalacións ao CCompostela, Rosa Ana García e María Pais pecharon a xornada destacando o labor do coworking e da Cámara.

A Rede Provincial

A Rede Provincial de Coworking aglutina distintos espazos de traballo localizados en municipios da provincia (viveiros de empresas, centros de negocio e coworking). O obxectivo principal desta Rede é establecer uns mecanismos de coordinación e colaboración na prestación de servizos a empresas e persoas emprendedoras  entre os distintos espazos  que formen parte dela. A Rede está formada por novos viveiros de empresas, centros de negocios ou  coworking creados baixo a demanda de Concellos  ou ben por centros xa existentes nos que o Concello ou entidade sen ánimo de lucro solicita apoio para o seu funcionamento e dinamización.

Espazos de traballo que forman parte da rede na actualidade:

Coworking Pazo de Arenaza (Oleiros)

LAB-Barbanza  (Boiro)

Daquí Darredor (Brión)

Espazo A Proa (Ames)

Centro de Transformación Agroalimentaria A Fusquenlla (Moeche)

Coworking A Capela (A Capela)

Centro de emprendemento A Estación (Vedra)

Green coworking (As Pontes)

Coworking A Pobra (A Pobra do Caramiñal)

Coworking Dixital CCompostela (Santiago de Compostela)

A Casa do Pescador (Miño)

Lab Barbanza: dende 2021

O programa de formación e aceleración Emprende-LAB Barbanza impulsado polo Concello de Boiro e a Deputación, contando tamén coa colaboración da Asociación Boirense de Empresarios (ABE), comezou a súa andaina en 2021 dando acubillo a 18 emprendedores da comarca.

O centro boirense está situado no Polígono de Espiñeira, propiedade do Concello, e conta con 283 metros cadrados de superficie útil distribuídos en 5 oficinas, sala de recepción, servizo de reprografía e sala para reunións, xestión e presentación de proxectos, así coma aseos e zonas comúns. O inmóbel dispón ademais de xardíns e zona de estacionamento exterior, insonorización, calefacción central de alta eficiencia enerxética, iluminación con LED de baixo consumo, conexión de telefonía e fibra óptica en todos os espazos e accesibilidade total para persoas con mobilidade reducida.

Entre as iniciativas emprendedoras seleccionadas na súa orixe atopábanse Fortem Hub, unha proposta formativa para persoas de colectivos vulnerábeis; Laflora, unha iniciativa para a produción musical e as iniciativas emprendedoras; Orenpay, que desenvolve unha aplicación móbil para o sector hostaleiro que permite ver a carta ou facer un pedido mediante códigos QR; E-commerce, de regalos personalizados, NadadeNada, un proxecto téxtil; Arándanos Barbanza, unha iniciativa de agricultura ecolóxica; Esteos, un proxecto de tecnolóxico baseado no Internet das Cousas para simplificar os procesos produtivos das empresas e minimizar custes; e GastroLab Arousa, unha escola de cociña cun espazo gastronómico orientado á formación e ás demostracións culinarias en directo. Tamén participaron Naturalmente, unha proposta de terapias alternativas para o coidado usando produtos naturais; e Fashion School, unha escola de corte e confeccións online.

O Coworking da Pobra

Creado en 2017, o Coworking da Pobra consta dunha área de 143’23 metros cadrados con capacidade para acoller 10 iniciativas emprendedoras: o espazo Emprende, con cabida para 8 módulos destinados a persoas emprendedoras que fagan uso desta prestación de maneira continuada, e o espazo Nómades, con 2 módulos dirixidos a quen utilice o centro de xeito puntual.

En 2022 foi cando se formalizou a súa integración na Rede Provincial de Espazos de Traballo Colaborativo.

O espazo de traballo colaborativo Coworking Pobra constitúese como un espazo físico de titularidade pública municipal para a promoción do emprego e o autoemprego. Ofrece o uso temporal do espazo a persoas emprendedoras ou a pequenas empresas tratando de promover o desenvolvemento económico local a través do apoio e o fomento de iniciativas empresariais, co consecuente efecto positivo sobre a creación de emprego e riqueza do tecido produtivo.

Actualmente aínda hai prazas dispoñíbeis para que novos emprendedores se unan e poidan, de forma totalmente gratuíta, impulsar o seu proxecto. O espazo, innovador, moderno e funcional, foi deseñado por Studio Moai.

Outros artigos

Domingo regresa o sol e empeza a subir a temperatura

Na xornada do domingo seguiremos con aire frío en altura xerando inestabilidade atmosférica. Unha situación que favorecerá a formación de chuvascos, localmente treboentos, máis probables e frecuentes no interior e nas horas centrais do día. As temperaturas mínimas...

+

Ribeira pon en valor o traballo das mulleres no mar

O Concello de Ribeira conmemorou o Día Internacional da Muller no Sector Marítimo rendendo unha homenaxe a tres mulleres extraordinarias que dedicaron as súas vidas a unha profesión fundamental para a nosa comunidade: o marisqueo. O concelleiro de Mar, Fernando...

+

Publicidade

Revista en papel

Opinión

“Día das Letras Galegas 2025”. Manuel Dominguez

“Día das Letras Galegas 2025”. Manuel Dominguez

Andrés do Barro, cantante, compositor de soul galego, grandes éxitos dende 1975 onde as linguas do Estado foron confinadas, censuradas, ata acadar o primeiro posto nas listas dos discos máis vendidos en España tres veces seguidas: primeiro en 1969 con O trem , logo en...