Unha delegación das organizacións ecoloxistas galegas Amigas da Terra, Ecoloxistas en Acción e Greenpeace estivo esta semana en Bruxelas reuníndose con europarlamentarios españois para informarlles dos impactos ambientais e sociais que carrexaría a instalación do proxecto Gama, a macrocelulosa que a empresa portuguesa Altri pretende instalar en Palas de Rei. Estes impactos, en palabras das entidades, serían graves e irreversíbeis.
A delegación viaxou xunto á Plataforma Ulloa Viva grazas á facilitación de Ana Miranda (BNG) e prolongou a axenda reuníndose tamén con Nicolás González Casares (PSOE) e María Eugenia Rodríguez Palop (Unidas Podemos).
Segundo as entidades ecoloxistas, “o que nun principio o presidente da Xunta anunciou como un proxecto ecolóxico, revelouse, coa presentación da documentación, como o que realmente é, unha industria para producir ata 400.000 toneladas celulosa solúbel e 200.000 de Lyocell, ademais doutros subprodutos como biomasa e xeso; é dicir unha nova pasteira a base de madeira de eucalipto que requirirá para a súa actividade diaria unha captación de 46.000 m³/día de auga –tanto como consume toda a provincia de Lugo– e un permiso de vertedura industrial ao río Ulla de 30.000 m³/día de augas residuais”.
Indicaron que “tamén emitirá xofre reducido total, óxidos de xofre, óxidos de nitróxeno, monóxido de carbono e material particulado, e suporá unha afección directa sobre a rede Natura e os seus proxectos de ampliación”.
Por iso, as representantes de Amigas da Terra, Ecoloxistas en Acción e Greenpeace solicitánronlle aos europarlamentarios que se opoñan á posíbel asignación dos fondos Next Generation para financiar este proxecto, xa que a propia empresa, firmemente apoiada pola Xunta de Galicia, manifestou que necesita optar cando menos a un cuarto do seu investimento (uns 250 millóns de euros dos 900 que di investirá) de diñeiro público de entrada, centrando actualmente as súas miradas nos fondos Next Generation e o PERTE de descarbonización da industria.
Carta a comisarias europeas
Ademais destes contactos cos representantes das forzas políticas, Amigas da Terra, Ecoloxistas en Acción e Greenpeace, xunto con SEO/Birdlife e WWF dirixíronse por carta á Sra. Céline Gauer, á Sra. María Teresa Fábregas Fernández e ao Sr. Giulio Federico, respectivamente responsábel, directora e xefe de unidade do Grupo de Traballo de Recuperación e Resiliencia (Recovery and Resilience Task Force), tendo tamén en Bruxelas unha xuntanza con parte do equipo mesmo grupo de traballo.
As cinco organizacións ecoloxistas trasladaron aos comisarios europeos que o proxecto Gama de Altri-Greenfiber “terá impactos ambientais irreparábeis e acelerará os efectos do cambio climático sobre esta área de especial protección e de biodiversidade”. Nas cartas á Comisión Europea resaltan “o incomprensíbel que sería conceder fondos públicos a unha actividade tan destrutiva, con afeccións directas á Rede Natura 2000 e varias especies ameazadas e en perigo de extinción, e que en absoluto cumpre o Principio DNSH (Do Non Significant Harm), condicionante indispensábel para vixiar que o destino dos cartos non afecte a cuestións tan vitais como a protección e recuperación da biodiversidade e os ecosistemas, o uso sostíbel e a protección dos recursos hídricos e mariños, ou a mitigación e adaptación ao cambio climático.
