O Museo Valle-Inclán da Pobra vai acoller o vindeiro 12 de abril, ás 20.30 horas, a presentación do libro Da caverna a acrópole. Un camiño cara a educación crítica, de Ciro Briones. Trátase dun acto organizado pola Asociación Cultural Barbantia, a Libraría LER, a Universidade de Vigo e máis o Concello da Pobra da Caramiñal. Intervirán, ademais do autor, Xesús Laiño (AC Barbantia), Ana Fernández Soneira (Departamento da Lingua Española da UVigo), Jorge Luís Bueno (Director do Servizo de Publicacións da UVigo) e Patricia Lojo (concelleira de Cultura da Pobra do Caramiñal).
Ficha do libro
Da caverna a acrópole. Un camiño cara a educación crítica confórmase como un ensaio que achega a filosofía á educación, establecendo como premisa a necesidade de desenvolver o pensamento crítico para acadar a plenitude dos valores e das capacidades da ensinanza. Indagando nas posibilidades que ofrece a filosofía como materia, esta obra busca reafirmar un lugar actual onde poida servir ao desenvolvemento crítico do alumnado.
A través dun camiño cheo de preguntas que percorre en clave poética, este ensaio unifica o ser e as súas expresións con pensamento e a educación; ampliando a mirada sobre a realidade, indagándonos autores e autoras referentes do pensamento e aportando interesantes propostas educativas. En definitiva, este libro é un vínculo entre filosofía, ensinanza e realidade, tratando de espremer as posibilidades da escola e reivindicando a conciencia persoal e social como parte das formación educativa.
