Este sábado 27 de abril, ás 20:00 horas, a Casa da Cultura de Outes acollerá a proxección do documental Suso. Fóra de lugar, centrado na figura do escritor compostelán Suso de Toro.
Contarase coa presenza do propio autor e máis do director do documental Alberto Sacido, veciño de Outes. Ambos participarán tamén no coloquio que se fará ao remate da proxección do documental.
A proxección da peza, da que se encargará a produtora Culturactiva, faise coa colaboración da Deputación da Coruña.
Segundo informan dende Culturactiva, Suso. Fóra de lugar é un filme de Alberto Sacido no que o escritor Suso de Toro revisa o seu camiño nas marxes, nunha conversa constante que o leva a revisitar os seus inicios, os seus modelos e proxectos literarios, os obstáculos na súa carreira, a súa militancia política, e o abandono e posterior regreso á súa profesión de escritor. “Trátase dunha peza audiovisual que non só se fai un repaso pola vida do escritor compostelán, senón que ademais se presenta o encontro con 26 persoas e colectivos cos que Suso de Toro compartiu as conversas que van construíndo o documental e que reflexionan sobre o seu traballo, a súa vida e as dificultades de ser escritor galego, tanto dentro como fóra de Galiza”, explica a produtora, lembrando que se trata da segunda longametraxe na que participa Alberto Sacido, que en 2014 presentou Unitarias, un documental que reconstrúe a historia das escolas do rural de Galicia a través da vida do seu pai, un mestre que empezou traballando nestas escolas nos anos 60. Mediante as súas experiencias, o documental presenta os cambios que tiveron que asumir xuntos profesorado e alumnado durante o último medio século.
A produción de Suso. Fóra de lugar contou co apoio fundamental de Culturactiva S. Coop., a entidade que proveu de recursos e asistencia técnica para facer posible a súa realización. A coprodución é de Danga Danga e a Postprodución de Arraianos.
Pola súa banda, este documental recibiu financiamento para a postproducción da Deputación da Coruña dentro da convocatoria de Proxectos Singulares do 2023, apoiando tamén a xira de presentación deste documental.
