O Concello de Rianxo continúa coa campaña contra a proliferación da avespa velutina e faino con diversas iniciativas que teñen un obxectivo común: frear a presenza deste perigoso insecto que pon en risco a supervivencia das nosas abellas, xa que son, como se ten constatado en moi diversas ocasións, un dos seus principais alimentos (acabando con colonias enteiras das abellas).
Así, despois da xornada formativa celebrada a pasada fin de semana na parroquia de Asados, na que tamén se repartiron trampas e material atraínte, o domingo 21 de abril terá lugar unha nova sesión no Centro Cultural Vicente Vidal de Leiro.
Tal e como sinatou o Concelleiro de Obras e Medio Ambiente, Alberto Angueira, “trátase dunha medida pensada para favorecer a erradicación desta praga, que está a prexudicar gravemente á abella autóctona e que xera situacións de alarma entre a poboación pola súa rápida proliferación.”
Angueira recordou, porén, que de non padecer alerxia, as velutinas non teñen por que ser máis perigosas que unha avespa normal, pero si máis agresivas, polo que sempre se recomenda gardar as distancias e chamar ao Teléfono de Atención e Información á Cidadanía 012 da Xunta de Galicia.
